勒拉国人文化当中，尤其是相互之间狭气熟悉呃人，无意当中碰到了以后，会得互相之间打声招呼问候一下、问问彼此间近抢把呃情况是哪能样子格，首先会得去问呃一句言话就是——侬今朝早哴向吃了啥呃么事啊（早饭）？！由于中国不但有得56个民族，而且地域亦是交关广泛呃，因此勒拉覅同地区里向呃人，伊拉讲法是覅相同呃。北京人就会得讲：“今朝早哴向吾喫呃是豆汁加焦圈！”湖北武汉人就会得讲“今朝早哴向吾喫呃是热干面！”陕西西安人就会得讲：“今朝早哴向吾喫呃是羊肉泡馍！”……凡是种种真呃可以讲是不胜枚举！
老上海人特色就是——勒拉相当“低调”当中，又包含着一种独有呃“奢华”，从骨子里向会得散发出一股浓浓呃“文人情趣”。上海有得一种独有呃气质，伊格气质就是——“自由”、“开放”、“包容”、“海纳百川”。迭格是老上海呃精神所在，也是传承至今呃文化底蕴！
勒拉老底子上海滩哴向，至少是勒拉上个世纪九十年代以前，上海人呃俗常生活当中，尤其是每天早饭摊头就要算“四大金刚”了，伊拉分别是“大饼”、“油条”、“豆浆”跟“粢饭团”。“四大金刚”呃极品地位，勒拉老上海人心目当中是呒办法去撼动呃。其中“大饼”还要分“甜大饼”跟“咸大饼”，“甜大饼”是圆形的，“咸大饼”是长（圆）形的；豆浆要分成三种，分别是：“淡浆”、“咸浆”跟“甜浆”；伊拉呃价钿分别如下：咸大饼三分；甜大饼四分；油条四分；淡浆三分；咸浆四分；甜浆五分。勒拉掰搿辰光，满师出徒以后呃正式工人，每个号头拿到手里向呃工资是36块5角，假使讲每一个人，每天早哴向喫一顿早饭要花特一角洋钿，伊绝对是属于“大户人家”了。
不过，上海人自称“四大金刚”呃讲法，绝对是被大家以讹传讹了。勒拉最最正宗呃老上海人眼睛里向、勒拉老底子，是根本就呒“四大金刚”迭种讲法呃，是由后来人所起的名字，因为喫迭格四样食物呃人狭气多，而且具有普遍性，因此就取名字为“四大金刚”。
“大饼”呃历史比较悠久，伊是由“面粉”、“淀粉”、“小麦粉”按照一定的比例，再去添加水，经过中国传统手艺炮制加工制成呃一种“面饼”，伊还会加入“猪油”、“芝麻”、“葱花”等其他辅材。
“油条”可以讲是一种相当古老呃汉族面食，长条形中空呃油炸食品，伊把人呃口感就是松脆有韧劲，是中国传统呃早点之一，勒拉各个地方几乎都有得油条，伊既可以单吃，酥脆香甜；也可以斩成数段“佐泡饭”、“泡豆浆”；更可以涮火锅；是别有一番风味格。据传说讲，“油条”迭样食品最早是发明于南宋宋徽宗时期，因为大奸臣秦桧迫害岳飞至死，民间老百姓对伊是敢怒不敢言，通过炸制一种类似油条呃面制食品名叫“油炸桧”，以此来表达对秦桧呃不满与愤怒。
勒拉老底子上海滩哴向，狭气讲究精致生活跟精打细算呃上海人家，伊拉勒拉喫油条呃辰光，会得把“油条”一分为两，一半除特欢喜配之以“（辣）酱油”，蘸着“（辣）酱油”一道喫以外，另外一半到了夜快头喫夜饭呃辰光，还会得去拿“油条”去做一道汤当汤来喫。不过，现在呃上海人对“油条”可以讲是“又爱又恨”，喫呃人逐渐变得少特了，只因为油条制作全过程中，会得添加“明矾”，“明矾”是一种化学制品，长期去使用对人体是有伤害坏处呃，老底子“明矾”是做为“食品添加剂”来使用，现在国家已经禁止各类食品当中添加“明矾”了。为此，老百姓还发明了一种覅加“明矾”呃“安心油条”，就可以放心去喫了，但不过“油条”毕竟是油炸类食品，假使长期去去喫呃言话，对于身心健康是交关覅好呃，还是难板去喫为妙。
同样是依据传说讲，“豆浆”迭样食品最早是由西汉淮南王刘安制作而成呃。先要把“大豆”用水浸泡泡透，等到发涨以后“磨碎”、“过滤”、“煮沸”而成。“豆浆”迭样食品营养狭气丰富，除特含有丰富呃“植物蛋白”、“磷脂”、“维生素B1.B2”跟“烟酸”以外，伊还含有“铁”、“钙”等各类矿物质，而且对人体来讲，交关易于消化吸收，适合于各个年龄阶段呃人群去喫。老上海人勒拉喫豆浆呃辰光，欢喜配之以“虾皮”、“紫菜”、“榨菜”等辅助食材，最后一道步骤，还要淋上几滴辣油。要是勒拉大热天里向，喫豆浆喫得来满头大汗，是交关过念头、惬意呃一桩事体啊！勒拉老上海人家，每当到了夏天家狭气欢喜去喫“冰豆浆”，冰凉凉喫到肚皮里向覅要特惬意哦，可以消热防暑；到了冬天家欢喜喫“热豆浆”，可以祛寒暖胃，滋养进补。
勒拉老上海人家口中呃粢饭（团），还被称之为“糍饭（团）”，就是“糯米饭”加“油条”简单到覅能在简单呃组合。“糯米饭（团）”是需要提前去煮好呃，煮熟了以后会得倒到一个大木桶里向加以备用，“粢饭（团）”呃饭是用“糯米”、“粳米”以3:1比例泡发蒸熟而成。当有得顾客要去购买呃辰光，一般营业员会得问对方一句言话，侬是要2两还是要3两，迭格就是糯米呃份量。覅管糯米饭（团）有得多少，勒拉粢饭（团）里向只会得包1根油条。后来又发明了甜味呃跟咸味呃，甜味呃里向会得去放“豆沙”、“黑洋沙”跟“葡萄干”；咸味呃里向会得去放“肉松”、“榨菜”跟“咸鸭蛋”，迭格是一种狭气新式喫法，不过勒拉老上海人家眼睛里向，是一种交关洋盘呃喫法。
上海人早饭除特“四大金刚”以外，还有得交交关关好喫呃各类早饭小吃，勒拉其中有项早饭小吃跟“四大金刚”有得一拼，可以讲是不相上下相差无几，喫呃人同样是狭气多，但凡是老上海人都是交关欢喜呃。但不过，伊格名字稍稍有一眼刮三了，被叫做了——“包脚布”。同样是根据历史传说讲，“包脚布”迭样食品，最早要追溯到明清时期，勒拉掰搿辰光是戏园子外面卖呃，伊格饼皮只有指甲盖那么薄，在配之以亮红的辣椒，青翠的小葱，嫩黄的鸡蛋跟热油条，包起来象旧时呃铅笔盒子一样，也是当时女眷散戏后呃宵夜标配。当时光迈入到民国时期上海滩，可以讲是“十里洋场华洋杂处”，外国人喫呃是“三明治”，将“火腿”、“生菜”等以面皮包裹，外加各类中西酱料配制而成，只因为勒拉掰搿辰光，“三明治”狭气昂贵，国人喫覅起，只好去喫喫“包脚布”，就成为了“十里洋场”最受欢迎呃小吃，而且还一直保留流传到了今朝，今朝上海人同样是欢喜喫“包脚布”。
之所以会得起“包脚布”迭种名字，完完全全是上海人按照伊格形象来起呃，迭种食品就好像有一个人，其中呃一只脚被别人家包裹起来一样，覅要特形象化哦。又因为上海人觉得“包脚布”迭三个字，覅管是去用上海言话来讲，还是去书写成为文字，都覅是交关好听呃，实在是覅大灵光啊，因此上海人就把当中呃“脚”字替换成了“角”字，变得稍许文雅一眼，有了文人气息，相互之间读音也是错大覅多呃。勒拉上个世纪八十年代呃辰光，上海人曾经做过迭能一桩事体，就是去评价过——上海滩哴向呃各类美食与各类上海人最最欢喜喫呃早餐，评价上海人所喫呃各类早餐，“包脚布”被排名勒拉第六位。因为率先发明了早饭小吃“包脚布”，后来又衍生发明了三句上海歇后俚语，伊拉分别是：“像一块赖婆娘呃包脚布——又臭又长”；“包脚布上飞机——一步登天”；“包脚布上生虮子——好角（脚）色（虱）”！
老上海人口中所讲呃“包脚布”就是北方人口中所讲呃“煎饼果子”。天津岩石乐队主唱、天津曲艺摇滚呃创始人李亮节，创作了交关多具有天津特色呃音乐，伊拉格音乐风格是将天津“快板”、“大鼓”等鼓曲形式跟摇滚音乐相互结合了一道，从而形成了一种曲艺摇滚风格，其中就创作了一首歌曲就叫《煎饼果子》，其中的部分歌词内容就是：“煎饼果子来一套/一个鸡蛋一块钱/喜欢脆的多放面/辣椒腐乳小葱花/铁板铁铲小木刷……放点面酱些许甜/趁热吃了似神仙”……
不过，上海人呃“包脚布”跟北方人呃“煎饼果子”绝对是覅大一样格，最最主要呃区别就是勒拉“面浆”上头，勒拉北方地区，尤其是最最正宗呃天津“煎饼果子”，伊必须要去使用“绿豆面”，上海人呃“包脚布”覅是掺杂了杂粮，就是用纯面粉摊成呃薄饼。
相比之下而言，做“包脚布”迭样早饭，总归是狭气“单吊”呃，只要一个人就可以去做了，只需要一个摊头、一口炉子，覅像其他各类早饭，需要大家一道去共同合作，才能把早饭做做好。勒拉掰搿辰光，做“包脚布”迭样早饭，还要分流动摊位跟固定摊位。假使是流动摊位，要另外去增加一部带有一个雨篷呃两（三）轮小推车。
勒拉老底子“包脚布”做法是迭能样子格，做“包脚布”全部都是使用煤球炉子，勒拉炉子上头还有一块圆形铁板，而且铁板是跟炉子连接勒拉一道呃，覅是分开来呃。事先就要把炉子生的旺旺呃，再去揺一小勺子面浆，紧接着就去用刮板流畅的刮成一个大小均匀呃圆薄饼，勒拉老底子所使用的“刮板”就是用“篾片”做成呃，然后再往薄饼上头敲一只到两只鸡蛋，打（搅）散涂抹搅拌均匀，里向还要包上一根事先油炸好呃油条，假使有人覅想勒拉里向加油条呃言话，可以勒拉薄饼里向去包裹一些油炸好呃薄脆，另外还要去配之以“五种”辅助食材，伊拉分别是：要抹上红黄两种颜色呃甜面酱跟辣酱，撒上一把青葱、一把香菜跟一把榨菜，“包脚布”勒拉烤制全过程当中，是覅用油呃，还是以干烤为主，所以做出来呃饼显得更加香脆。
至今还能清楚的记得，勒拉笔者7岁到16岁呃辰光，是住勒拉原上海市浦东地区川沙县有着800多年历史、营造之乡美誉呃名叫“高桥”的古镇上，伊格辰光认为最最好吃呃早饭就要算“包脚布”了，个人也是狭气欢喜喫呃。但不过，勒拉掰搿辰光、勒拉高桥古镇哴向是呒得一个早饭摊头（点）呃，然而外公外婆则是住勒拉原川沙县洋泾古镇，【备注：现在这两块地区分别为：浦东新区高桥镇、洋泾地区（街道）。】只有每趟去外公外婆屋里厢，才能喫得到“包脚布”。
勒拉掰搿辰光，做“包脚布”呃人多数是中年阿姨为主，只有极少数是中年爷叔勒拉做，包脚布里向到底要添加啥呃么事（辅助食材）只要特伊拉讲清爽就可以了。吾伲经常是勒拉洋泾镇“三井”地区买“包脚布”呃，【备注：“三井”就是勒拉“宁歇线”摆渡船附近，抗战胜利以后，还被取名为“胜利镇”，现在已经被拆迁掉了。】还会得对做呃人讲侬就特吾来兜一圈，做“包脚布”呃人就晓得明白了，全都要的。当时三姨夫沈长俊跟姨妈倪兰英就住勒拉“三井”地区，每趟只要是被伊看到吾伲勒拉买“包脚布”以后，就会得赶快从屋里厢拿出两只鸡蛋，给做“包脚布”呃人讲鸡蛋自己有的。伊还悄悄的对吾伲讲：“省一钿是一钿，把伊拉攒去鸡蛋铜钿就呒意思了嘛！”
笔者还听到了一则新闻，今朝上海滩哴向，“包脚布”也“时尚”了一回成为了“网红”，有商家对外号称做的是老上海人“最传统呃包脚布”，要排狭气长呃队伍，人也是交关多，到了周末毛估估起码要等上个把钟头才吃得到，笔者一趟也呒去喫过。据喫过呃人讲，所谓呃“包脚布”是用机器加工做出来呃，覅像老底子是手工做出来呃，老饕们喫过以后总觉得米道覅够正宗，有一眼受骗上当呃感觉……
【备注：①文章为作者原创；②各类上海早饭“四大金刚”图片及“包脚布”图片均取自于网络上；③各类文字动图图片均来源于网络上；④感谢原创图片。】
杜老倌侠客居（陆伟）写于2019年08月07日星期三晚上