冇有怕（摄影:双镜头）

图片发自App

      睇到一位网友话，广西梧州人将“唔怕”讲成“冇有怕”，好鬼得意。我重知道一单听错咗“冇有怕”，搞出个大头佛嘅趣事。先几年，广西一个大企业嚟广州参加拍卖会竞拍闹市一块地皮，当时十几家争，竞价鬼咁火爆。到最后净番一家广州企业同广西呢家企业争，广州企业叫价一亿五千万，已经到广西企业事前定价上限，广西代表即刻打电话向领导请示：“已经一亿五千万，重跟唔跟拍？”“一亿五千万？怕唔怕？冇有怕！冇有怕！”但当时现场嘈杂到咩嘢噉，广西代表将“冇有怕”听成“冇有拍”，就放弃举牌。当拍卖锤敲下后，广西领导打来电话：“冇有怕，再去马，我嘅底价系一亿八。”广西代表当场晕低。后来广西企业喺附近摞咗另一块冇咁靓但更贵嘅地。唉，听错一个字，损失几千万。

     细个嗰阵时重听过一个笑话：阿甲个名叫“李广先”，阿乙个名叫“吴广住”，两个初见面，乙问甲：“你好，你叫乜嘢名啊？”甲话：“李讲先。”乙唔知呢个就系甲嘅姓名，以为甲要自己先讲，就答：“哦，吴广住，你呢？”甲亦系误会乙唔肯先讲，两个人反反复复噏“李广先”，“吴广住”，以为对方有意刁难，几乎打起跤嚟。最后好唔容易先搞清楚乜嘢回事。

    唔单止同音唔同字会搞错，有时同音同字喺特定嘅场合都会闹笑话。好似“徐副主任”睇落去冇乜嘢，称呼对方就会尴尬。两家联婚，男家姓“老”，女家姓“窦”，酒店门口摆住“老窦联婚”就好搞笑勒，唔知底下加个括号（并非爸爸），好唔好啲呢？

    总之，白话大有学问，大家都多睇多写多交流，就一天都光晒喇，仲使乜惊会畀人禁止呢。