南腔北调唔紧要___六一见闻

    白云山西门喱边平时水静鹅飞，六一节喱日居然热闹到马骝升官——唔系人咁品，直情系人山人海爆嗮棚。跟住一群一群嘅男女老幼后边慢慢行，我发现今年讲北方口音嘅人多咗好多，尤其系年轻嘅妈妈同细路。人群结构中，普遍系三代同行，老人家多系本地人，第二代好多系外来媳妇本地郎，第三代儿童当然就系今日主角，有坐婴儿车嘅，更有一路蹦蹦跳跳，欢声笑语嘅。而其南腔北调似乎冇影响相互之间嘅交流。唔信马上有版俾你睇：我右前侧有个三四岁嘅男仔跑离人群，即时有个老年妇女跟住追出，并用带广州音嘅普通话大大声咁话：小苦（虎？），不要跑那么快，奶奶跟不上啊。旁边有个估计系细路妈咪嘅青年妇女拉住老人家，用生硬嘅广州话讲：你小身（心）啊！又用标准普通话对身边一个八岁左右细路女讲：快去逮住弟弟！只见细路女迅速咁用广州话同啊嫲讲声等我去啦，跟住一边追一边用普通话呼喝：小虎，你给我站住！

   中午食饭习惯去水库边果间餐厅唔使问阿贵都系打崩头咁旺，好彩老细识做即时加台都唔使等好耐。食食下，几乎贴背脊嘅隔喱围台两个后生女人讲嘢传咗入耳：（一个系北方话）：“你婆婆对你都算不错了，你老家几口人过来旅游管吃管住也没意见”，（另一个系唔标准嘅广州话）：“你以为啦，姖好有鸡（机）心架，有嘢净系同我老公讲。”（北方话）：“比俺婆婆强多了，你还身在福中不知福。上次俺老爸来广州在客厅住了两天就受不了婆婆的冷言冷语提前走了。”（非标准广州话）“咁你个家婆又几嗮（西）利啵。”我正听得过瘾，点知隔喱两个五岁左右女仔讲嘀嘢仲震憾。（广州话）：“你仲未开微信呀，我小班就开咗，宜家已经有十个群啦。快嘀开啦。”（普通话）：“都怪我爸不讲信用！他原来说六一节送台平板给我做礼物，谁知又说要交小学赞助几万块，明年才送，气死我了！”（广州话）：“咁你用电脑开都得啦，记住加我朋友哦。”

 我听到一额汗：哗！宜家嘅细路真醒目夹西飞利！感慨之余，整番首打油诗先：

南腔北调唔紧要，

鸡同鸭讲知巧妙。

河东河西时时转，

一代新人更骄俏。