就勒拉近几年唻，每年只要是到了夏天季节里向，流行起了一款迷你手持充电电风扇。从中小学生，乃至于到年长者，既覅管是勒拉烈日骄阳下头，还是勒拉公交车站等公交车呃辰光，也覅管是去菜市场买菜呃辰光，还是勒拉菜市场里向呃各类小商小贩们，伊拉人人侪都会得去持一把小电风扇，对牢自家去吹嗰覅停，好像已然成为了一种标配，就连得本人也是紧跟着赶了一回时髦，去购买了两把。
今早仔，伴随着电风扇搭空调呃广泛普及，已经很少有人再会得愿意去使用扇子了，或许就勒拉一些年长者，尤其是那些爷爷辈分呃人，极有可能还会愿意去使用扇子。勒拉本人所在呃城市上海、勒拉老底子，当空调还呒得去发明以前、还未曾广泛呃普及到千家万户之前，每年只要是到了夏天季节里向，每家每户几乎是人人手拿一把扇子，所使用呃扇子，也是各式各样大小不一，具有覅同呃特色。
夏天季节里向乘风凉呃辰光，勒拉所有呃扇子当中，蒲扇勿单单是最最大呃、邪气普通呃，而且伊呃价钿也是顶顶便宜呃，勒拉掰搿辰光，真呃可以讲是价廉物美，而且勒拉掰搿辰光，每户人家至少要配备两把以上，因为伊是用细竹条围起蒲葵叶子制作而成呃扇子，故而又畀大家称之为“芭蕉扇”。尽管是迭恁样子，伊是有缺点呃，就是——覅经久耐用，辰光一长久而久之，细细呃竹边邪气容易开裂散架，顶多也只好去使用两三年光景，就要去调换新呃蒲扇，每当有新买回唻呃蒲扇，为了恁够让伊经久耐用一些，自家就会得使用屋里厢废旧的、弃之覅用呃零碎布条畀包扎上一圈，再用针线去缝补好。勒拉通常情况下头，蒲扇用得最最多呃人，还是那些老年妇女了。
蒲扇除忒勒拉炎热呃夏天季节里向拿唻乘乘风凉以外，伊还有得另外一嗰作用，那就是——勒拉老底子，由于每家每户侪都要依靠各式各样呃煤球炉子唻烧水做饭菜呃，而且家家户户僎都要去生煤球炉子呃，用蒲扇扇风可以让煤球炉子烧得更加快更旺盛，还恁时覅时呃扇走炉子里向冒出唻呃烟尘。但畀过，要是操作覅当或者操作者覅够规范呃閒话，交关容易辣到自家呃眼睛呛到自家呃鼻头，覅停地流眼泪咳嗽，笔者勒拉小辰光也生过煤球炉子，也碰到过上述情况。
据专家考证“扇子”是由中国人发明呃，然而“折扇”却是由日本人发明呃。“折扇”一词最最早就出现勒拉吾伲国家历史哴向公元五世纪呃南北朝时期，《南齐书》上讲道：“褚渊以腰扇障日。”，其中“腰扇”迭两嗰字，依据《通鉴注》上头呃解释，“即为折叠扇。”“折扇”伊有得交关多呃别名，又畀称之为“撒扇”、“繖扇”、“掐扇”、“摺迭扇”、“摺叠扇”、“聚头扇”、“聚骨扇”、“櫂子扇”、“旋风扇”。但畀过，“折扇”勒拉南北朝时期还覅是顶顶流行呃，一直要等到了北宋时期，“如市井中所制折叠扇……展之广尺三四，合之止两指许”，市井有制，说明迭嗰辰光已覅是少数人专用呃。虽然讲已覅是少数人专用呃，对于一些普通老百姓唻讲，依旧还是用覅起、覅恁去使用折扇呃，真正开始风靡全国普遍侪都去使用折扇，是从明朝永乐皇帝开始呃，因明永乐皇帝邪气喜欢使用折扇，带动了大家侪都去使用折扇，正所谓“上有所好，下必甚焉！”
每年只要是跨入到了夏天季节里向，“折扇”是一些文人雅士、有点学问搭文化知识呃人呃最爱了，勿单单是迭恁样子呃，那些年长者、爷爷辈分呃人，伊拉也同样是对折扇钟爱有加，更是伊拉呃众多标配之一。就算是迭恁样子，也同样是要区分出三六九等唻呃，对于一般呃知识分子唻讲，伊拉侪都配之以普通呃竹骨制扇子，选用“玉竹”、“白竹”、“斑竹”……各方面条件稍稍好一眼眼呃知识分子唻讲，伊拉会得去选用红木制呃扇骨，选用“鸡翅木”、“紫檀木”、“乌木”……更好一眼眼呃知识分子人家，则会得去选用珍贵呃动物作为扇骨，有“玳瑁”、“象牙”、“牛角”……依据折扇扇骨呃好坏，还会配之以相应呃扇面，由低至高，扇面分别为“纸扇”、“绢扇”、“丝扇”等等……勒拉“纸折扇扇面”当中，又可以去细分为：“素纸折扇扇面”、“色纸折扇扇面”、“金笺折扇扇面”、“发笺折扇扇面”搭“集锦折扇扇面”等各种类别；勒拉“绢折扇扇面”当中，又可以去细分为“素绢”、“金（银）绢”搭“色绢”三嗰类别。笔者记得勒拉掰搿辰光，一些年纪交关大呃年长者、爷爷辈分呃人，绝大多数呃爷爷辈分呃人，侪都邪气欢喜去使用颜色为黑颜色呃素纸扇面，伊拉顶多也就勒拉黑颜色呃扇面上头去配之以烫写金字。
“扇骨”又名为“扇股”，一把上好呃“扇骨”是以“档”和“尺寸”唻划分呃，最低呃有九档，最高呃有四十档，中间有十一档、十二档、十三档……二十档、二十二档、二十四档……伊呃尺寸通常为五嗰类别，分别为：八寸（28.3厘米）、九寸五（31.7厘米）、一尺（33.3厘米）、尺一（36.7厘米）搭尺二（40厘米），九档搭十一档是日式扇骨，勒拉扇骨上头描绘各式各样呃图案，勒拉制作技法中有“阳雕”、“微刻”、“镶嵌”、“髹漆”、“烫花”、“手绘”。
除忒上头所讲呃以外，扇骨呃样式也是由简而繁、各式各样、层出覅穷呃。勒拉最初呃辰光，伊呃造型是“直式方头”呃，形状是长而窄呃梯形；到了后末唻就出现了各式各样呃变化，有呃扇骨伊呃尾部是圆形呃，就搭和尚呃光头是一色似样呃，就畀称之为“和尚头”，“和尚头”又畀区分为“大圆头”搭“小圆头”；有呃扇骨伊呃尾部搭弹奏呃乐器琵琶是一色似样呃，故而名为“琵琶头”；有呃叫做了“螳螂腿头”，僎是因为扇骨上头是邪气粗呃、伊呃下头又交关细，形状颇似螳螂腿，因此就去起了迭嗰名字；有呃扇骨是“波折式”呃，伊呃大小扇骨侪都是做成“波折式”呃，就勒拉相邻处呃两根扇骨还有得“波峰”搭“波谷”，而且“波峰”搭“波谷”之间还要相互交错，看上去好似一层又一层呃波浪，显得动感十足，迭种式样勒拉一般情况下头，多见于十六档竹骨大扇，凡是种种还有交关多……
对于一些小女孩搭待字闺中呃小姑娘唻讲，伊拉多数人会得去使用呃扇子侪都是“团扇”，伊呃形状覅是圆形呃，就是近似于圆形呃椭圆形扇面，伊呃扇柄覅是邪气长呃，“团扇”又名为“宫扇”搭“纨扇”，伊最最早出现勒拉吾伲国家历史哴向呃商朝时期，伊勒拉最初呃辰光，材质是用五光十色呃野鸡毛制作而成呃，最初伊呃名字畀定名为“障扇”，勒拉最初呃辰光，伊呃功恁覅是用唻扇风乘风凉呃，而是作为帝王勒拉外出巡视呃辰光，专门是用唻挡风遮阳避沙呃。勒拉宋朝之前，畀所有呃扇子侪都称之为“团扇”，勒拉吾伲国家历史哴向呃盛唐时期，著名呃边塞诗人王少伯王昌龄就著有《长信怨》一诗，勒拉迭首诗呃里向就撰写有“团扇”，伊勒拉第三句当中是迭恁样子唻写到呃，讲道：“奉帚平明金殿开，暂将团扇共裴回。”
对一些中青年妇女唻讲，尤其是经济条件要稍微好一眼呃人家、邪气讲究精致生活搭品味呃中青年妇女，侪都欢喜去使用“檀香扇”。据说“檀香扇”是由“摺扇”演变变化而唻呃，伊呃扇骨就采用了“檀香木”制作而成呃。“檀香木”又畀称之为“旃檀”，伊呃性质是迭恁样子呃，木质皮肤色白者为“白檀”，皮肤色紫者则为“紫檀”，伊呃木质勿单单是邪气坚硬呃，而且还自带一种纯天然呃香咪道。勒拉夏天季节里向，去使用檀香扇扇风乘风凉呃辰光，可以却暑清心，真呃可以讲是清香四溢四处飘香，故而有得“一扇在手，香溢四座”呃讲法，更有得“扇存香在”呃美誉。跨入到了秋季时节里向，畀檀香扇隐藏勒拉衣箱当中，勿单单可以香袭衣衫，还恁起到防虫防蛀呃功效。檀香扇勒拉通常下头，可以去保存十年八载之久唻，即便是到了存放呃年份，伊依然还恁够“日日花香扇底生”。记得勒拉笔者呃小辰光，家母就配有一把檀香扇，勒拉夏季还拿唻乘乘风凉呢！
“檀香扇”是吾伲国家呃四大名扇之一，伊呃制作技艺主要分成三嗰派别，伊拉分别是苏式（苏州制作）、杭式（杭州制作）搭广式（广州制作），苏式呃檀香扇多数是以绢画居多，杭式搭广式呃檀香扇多数以拉花著称，苏式呃檀香扇，因为伊呃“工艺精良”、“玲珑纤巧”、“芬芳馥郁”，是邪气富有地方特色，扇面大多采用绢面，扇骨还会得去拉制出各式各样呃图案，伊呃式样就有得“全面”、“格景”、“中空”搭“西泠”等等……并且还要配以“四花”见长。【备注：所谓呃“四花”就是指“拉花”、“烫花”、“雕花”搭“画花”。】外加之伊呃色泽秀丽典雅大方，因此讲邪气受到全国人民呃欢喜。
俗语有言曰：“坐要有得坐相，站要有得站相！”其实，嗰人勒拉扇扇子呃辰光，也同样是要有得“扇相”呃，也一样恁够去看出某个人呃品行，到底是哪恁样子呃，对于一些文人雅士、有眼学问搭文化知识呃人唻讲伐，伊拉就欢喜畀扇子置于自家呃胸前，微微呃去轻摇着扇子；对于一些性格豪爽呃彪形大汉唻讲，就欢喜袒胸露乳大幅度覅停呃狂扇；对于一些交关讲究精致生活搭品味呃中青年妇女唻讲，勒拉扇扇子呃辰光，伊拉就邪气欢喜畀自家呃扇子去遮挡住半只面孔，一旦碰到了交关高兴呃地方，就会得去莞尔一笑；对于一些年纪交关大呃、老年妇女唻讲，伊拉勒拉使用扇子呃辰光，绝对是全方位、有得多种用途呃，既是为了驱赶走周遭呃蚊虫，又为了拍忒灰尘。
笔者出生勒拉上嗰世纪70年代呃末期，畀大家称之为“70后”，尽管自家呃屋里厢也去装了吊扇搭空调，至今为止，每趟仔只要是到了夏天季节里向，仍然欢喜去手拿一把折扇唻乘风凉。假使讲，光光去使用扇子、扇扇子，就恁够去乘风凉，并且还恁够去止住冒汗搭流汗呃现象，坚决覅会得去使用吊扇搭空调，扇子也是环保产品。
笔者从小就对各式各样呃扇子钟爱（青睐）有加，记得就勒拉自家足岁六岁呃辰光，家母畀了笔者一把长勒拉13.5厘米呃铁质小折扇用唻乘乘风凉，打开折扇，扇面里向印制了一朵盛开呃黄色菊花。迭把小折扇大概是购买勒拉上嗰世纪呃70年代初中期，是爷娘买畀了大自家五岁呃亲大哥勒拉夏天季节里向乘风凉用呃，等到伊本人覅再去使用了以后，又把扇子留畀了笔者唻使用。辰光走到了今早仔，自家还恁够清楚呃去记得，笔者勒拉青少年呃辰光，每年只要是到了炎炎呃夏天季节里向，自家总归是手不离扇，拿起扇子一刻覅停呃呼呼扇起唻，由于所购买呃扇子，伊呃材质侪都是邪气推扳呃，每年夏季总归要扇坏一两把折扇，铆扇骨呃铆钉总会从中间折断一分为二！
【备注：①文章为作者原创；②各种和文章有关的图片以及各类文字动图图片均来源于网络上；③感谢原创图片。】
杜老倌侠客居（陆伟）写于2018年09月05日星期三晚上