氹老婆的笑話情書 (港式口語風格冩作) - 第一章
2022Feb13
有一日一身黑皮緊身衣殺手女皇到生果皇后舖頭買生果, 女皇問果后: “今日有咩生果最好?”果后答: “今日返了幾箱靚橙。”自傲的殺手女皇再問: “你們有切生果服務!咁切一個橙要幾多刀?”果后感覺到對方問者不善,亦提升霸氣答:“這幾箱是有機橙,識食唔會用刀,去完洗手間用手搣橙皮最有風味,知無!妳要幾多,我剛去完洗手間回來,正適為妳服務。”自此兩人惺惺相惜,擇日再戰。
2022Feb14
話說昨天果后言語之間小勝一仗,但論到吸睛能力就比下去,無它嘅,當時一身黑皮緊身衣苗條身材的殺手女皇踩場,在塲所有的雄性生物(由得10歲得兩同鼻涕的小華D到80歲嘅都叔,再加上果后補面兩隻唔知是熊是狗的巨大吉祥物),全程眼都唔眨䀹到實。為了加強戰力,果后放工後到附近的H&M買了紅色短毛大褸,再回家漏夜將公司黑色圍裙改腰間打摺。今早果后開舖,所有入場的雄性和雌性無不擘大「嘩」一聲,(當然兩隻吉祥物都是擘大口,但冇「嘩」一聲),所有顧客都諗,疫情期間生意難做,賣生果都要轉型搞噱頭。果后原本嘅黑色公司圍裙變成好似黑色短裙,加上配襯網格高身絲襪和最重要的外層紅袍加身,令賣生果嘅鋪頭氣氛上變成唔再係單純賣生果嘅舖頭,格調高好多。 果后成朝在鋪面門口行嚟行去,一來耍試試新「武器」的殺傷力,二來要「等著你回來」。 早上9點30分,果后期待已久的殺手女皇終於出現,同昨日一樣穿一身黑色緊身衣來買有機橙,因為確實果后冇介紹錯,有機橙是好好食,好甜嘅真實橙味又好juicy。 果后先開聲講一聲 “早晨,今早生果好靚,然後就揞住半邊嘴笑細聲講,“哈哈哈,點解你著返琴日套衫嘅?”果后眼神中流露出勝利嘅姿態。殺手女皇回眸一個有點眼瞓但隨既凌厲嘅眼神,掃視一下果后今日嘅衣著,氣定神閑答, “我呢兩日返夜班呢件係公司「保安製服」,保護色呀!小學雞。” 買完橙後的殺手女皇,回家路上一路為說出「小學雞」這三個字小勝一仗 而會心微笑。但她不知道果后跟本唔明「保安製服」是殺手界夜行衣嘅暗語,更唔好講保護色呢啲專有名詞,只覺得殺手女皇是跌落地揦返拃沙,工作時亦不時為自己的勝利偷偷會心微笑。
2022Feb15
兩間不同的房子,兩個不同身份的女性,在昨天西方情人節晚上都是靜靜地獨自一人度過, 果后交疊著相雙腿坐在梳化上, 一邊煲劇一邊細嚼日本第一蘋果, 殺手女皇沭浴後以白毛巾包裹著身體坐在MacBook(蘋果手提電腦)旁品嘗有機橙, 兩人都唔係無人約,而是心有屬, 但心上人唔喺身邊, 沒辨法哪, 人人如是為口奔馳。當然兩位神級女性都不乏觀音兵追隨, 而且是中情毒甚深嗰種。從來無「專家」為兩位女神播單戀情毒公佈過確診人數, 但就作為一個旁觀者的我來看, 初步確診人數是每日俱增緊, 確實對其她求偶阶段的雌性人類構成嚴重威脅。假如我是世衛總幹事「啖得菜」, 一定會作出全球呼籲, 要求全球女神級的女性在家隔離, 減少她們不必要的外出, 不經已地散播高傳染性的單戀情毒 - 戇男狂, 同時要求各國藥廠加強研發對抗戇男狂的疫苗, 否則「專家」推算地球上人類總人數會在末來10年會急速下降, 太空人唔計。
殺手女皇身邊就有一位叫琴小明的觀音兵,在殺手界別中被稱為「禽獸」,兇猛的外號嚇得下人,實則係文青宅男一名,當佢話好鐘意呢個格格不入的的昵稱時,我留意到左手不其然按在右心房位置上而且眼泛淚光,是口不對心?還是心跳加速開心到標眼淚呢? 琴小明有一雙瘦美的長腿,喜歡穿禮服,專挑有高級宴會的殺手工作,講不上可以又食又拎,但這種工作環境,食飯時間相對比較固定,,能得到有營養的均衡飲食之餘,又唔洗買菜煮飯同洗碗,是殺手界中多人爭奪的筍工,更重要是「禽獸」仲可以時不時利用宴會廳中的三角琴展露兩手超非的琴技,一眾路人甲,無知婦孺為之歡呼拍掌,據他自己講亦試過有人既場送花及索吻,為琴小明帶來無限滿足。「禽獸」初出道時師傅幫起的朵原本是「琴瘦」,雖然咕怪啲,但標奇立異的好處喺,表現出他的獨特性及引來顧主注意到這位新人, 不竟琴小明不是好打得嗰種。之所以後來變成「禽獸」,據我深入了解和分柝,真正的原因有三個,第一,這個年頭,殺手界別與其它專業或不專業界別無分別,太多數人不求甚解 ,加上新入行嘅水準參差,喜歡以訛傳訛;第二「琴瘦」有特殊癖好, 彈琴養鴿踩甴曱(蟑螂),同行一些人為之側目,在一次宴會的工作上,就因不滿有一款菜式是乳鴿及酒店廚房惠生問題题忍唔住入去踩甴曱,因而走失目標人物與顧主抄大鑊;第三得罪咗一位同行的三八女性,種下禍根,那位女性狠狠地將他「琴瘦」的各號改成「禽獸」,在她按下鍵盤Enter鍵向全球所有殺手組織發送那一刻,琴小明的人生亦改變了,工作多咗,收入豐厚咗,個人開朗咗,及至後來認識了殺手女皇才知道過中原因。