闲话上海之——话“洋”字（上海方言文章）

       

图片发自App

        上海勒拉1843年就开埠了，是一座五方杂处额城市，最易接受、吸收外来文化与多元文化，城市文化啊是兼容并蓄额，勒辣老底子额上海文化当中，上海人最最欢喜用额词语之一，就一个“洋”字了。

图片发自App

        勒辣老底子上海，假使有一个大人，或者一群大人，看到一个小囡马相长得交关好看，不管伊是男小囡，还是女小囡，上海人统统都欢喜称伊为“洋囡囡”。

图片发自App

        勒辣老底子上海，上海人家家户户都要用到煤球炉子，经济条件好一眼额人家，会得使用煤油炉子，生炉子所用到额“火柴”，上海人勿是称伊为“自来火”，就是称伊为“洋火”。“洋火”额使用频率要比“自来火”来的高、来得多，之所以上海人欢喜把“火柴”称之为“洋火”，就是因为“洋火”是由外国人发明额，是外国人从外国引进到中国、引进到上海来额！

图片发自App

        勒辣老底子上海，某些做生意额各类商贩，最最欢喜就是——“斩人家葱头”。“斩人家葱头”迭句闲话额意思是讲，对于勿灵行情与市面额人，伊来买么事，可以狠狠交敲人家一记竹杠、骗人家一眼铜钿，拿低档物品高价卖把别人家。还有一句闲话叫：“伊拉专门是斩洋葱头额！”意思是讲，勒辣做生意额过程当中，专门欢喜去敲外国人额竹杠、骗外国人额铜钿，因为外国人对中国额情况、行情与市面勿大清爽，所以很容易下手。不过，现在额老外们，门槛啊变得越来越精了，要想敲老外额一记竹杠，骗伊拉额铜钿，就勿像过去加么容易了！

图片发自App

        勒辣老底子上海，混迹于江湖（职场）中额上海男人，或勒辣江湖（职场）中“讨生活”额上海男人，必定要准备好一两套出客的行头——“洋装”，哪怕是经济条件老推板额男人，也要准备好一套“洋装”，所谓额“洋装”就是“西装”。假使讲，所穿额西装有明显额破损之处，又易被别人家发觉额闲话，上海人最欢喜讲一句闲话就是：“迭额人真是一个洋装瘪三！”还有，上海人发明了“假领头”，“假领头”又叫“节约领”，上海人穿西装一定要戴一条领带，假使是衬着假领头戴着领带，就算碰到天气炎热额日节，都不好把外套脱了，脱了外套，上海人就会的讲伊：“迭额人赤膊带领带，真是一个洋装瘪三嘛！”……容易被别人家看勿起、议论纷纷、说三道四一番……

图片发自App

        勒辣老底子上海人俗常生活当中，对于钞票额数量单位勿大欢喜讲“元”，特别欢喜讲“块”，如果侬到小菜场去买小菜问价钿、讨价还价，讲几元1斤，就算还价成功了，营业员啊会勒拉背后讲伊：“迭额人标标准准是一个洋盘，有眼阿乡兮兮（滴答），大概今朝伊从十六铺码头刚刚上来！”……上海人还发明了一个词语“洋钿”，自从发明了“洋钿”迭额词语以后，勒辣讲“块”额辰光，后面一定要加一个“洋钿”迭额后缀词语，如：一块洋钿、五块洋钿、十块洋钿……就算是讲到了角分，最后眼板数要加“洋钿”两个字，如：五分洋钿一把葱，一角洋钿三块老姜……老底子钞票金额最高是十块，不过自从诞生了50块帮100块面值以后，就勿加“洋钿”两个字了，因为加了“洋钿”两个字，读起来就勿大流畅了，所以就勿用了。尽管“洋钿”迭额词语，现在用得比较少了，但是，偶尔听到有人还勒辣讲，还是感到蛮亲切额。

图片发自App

        还有，正因为上海是最早开放、最早接受外来文化帮西方文化额城市之一，所以勒辣俗常生活当中，不管啥额人、啊不管伊具体是做啥额事体，都比较欢喜跟“洋”字搭架、跟“洋”字沾亲带故做亲眷。

图片发自App

        上海人欢喜把土豆或马铃薯，称之为“洋山芋”；吹的各种气球称之为“洋泡泡”；连讲到“蜡烛”两个字，啊要勒辣“蜡烛”前头加一个“洋”字，称之为“洋蜡烛”，还有一句上海俗语讲得好：“侬迭额人真是个洋蜡烛，勿点勿亮！”；清朝后期至解放初期，吾伲所使用额各种银元，譬如讲：光绪元宝、袁大头、孙大头、墨西哥鹰元……上海人一律称之为“银洋钿”；就连跟吾伲隔海相望额邻国——日本，上海人啊要称伊拉国家额人，不是“东洋人”，就是“东洋鬼子”……

图片发自App

        关于“洋”字额词语帮故事，还有交交关关，一时头浪讲啊讲勿光！

图片发自App

      【备注：①文章为作者原创；②各类老上海风情图片均来源于网络·由连环画大师贺友直画；③感谢原创图片。】

图片发自App

        杜老倌侠客居（陆伟）写于2014年01月31日星期五晚上